AssA - Þekking og Þjálfun

Stefnumót á Ströndum er stórt tengslamyndunarverkefni þar sem leitast er við að efla tengsl ólíkra aðila á Ströndum með því að leiða saman hefðbundna og óhefðbundna starfsemi. Er það von okkar að farsælt samstarf ólíkra aðila efli byggð og verði kveikja að nýjum hugmyndum til framfara.

Þróunarsetrið á Hólmavík og Arnkatla 2008, samtök ferðaþjónustuaðila í Reykhólasveit og Ströndum, standa fyrir sýningunni en AssA, þekking & þjálfun sér um framkvæmd hennar. Um 60 sýningaraðilar, fullorðnir jafnt sem börn, taka virkan þátt í sýningunni sem er bæði fjölbreytt og fróðleg. 

Mikil hátíðardagskrá fór fram laugardaginn 29. ágúst 2009 þegar sýningin var opnuð í Félagsheimilinu á Hólmavík.  Forsetahjónin, herra Ólafur Ragnar Grímsson og Dorrit Moussaieff, heiðruðu Strandamenn með nærveru sinni á opnunardaginn en forsetinn er verndari sýningarinnar.  

Dagskráin á opnunardaginn hófst með vinahlaupi yfir nýjan veg um Arnkötludal sem verður opnaður seinna í haust. Vegurinn mun efla samgöngur og tengsl Strandamanna og íbúa í Reykhólasveit. 

Um það bil 30 hlauparar á öllum aldri, vanir og óvanir, tóku þátt í hlaupinu fyrir hönd Héraðssambands Strandamanna og hlupu þeir með vinakveðju til móts við nágranna þeirra í Ungmennafélaginu Aftureldingu í Reykhólasveit.  Á miðri leið skipust þeir á vinakveðjum auk þess sem íbúar Reykhólasveitar afhentu Strandamönnum stein í vörðu til framtíðar sem reist var á Hólmavík á opnunardaginn.

Fjórir ættliðir Strandamanna, Sverrir Guðbrandsson eldri, Guðbrandur Sverrisson, Sverrir Guðbrandsson yngri og Jakob Ingi Sverrisson reistu vörðu til framtíðar fyrir utan Félagsheimilið á Hómavík á opnunardaginn.  Allir þeir sem komu að sýningunni sem og gestir hennar komu með stein í vörðuna úr sinni sveit.  Steinarnir komu víða að, m.a. frá Vestmannaeyjum, Borgarnesi og Bolungarvík.  Forsetahjónin komu með steina frá Bessastöðum sem þau lögðu í vörðuna.

Stefnumót á Ströndum, atvinnu- og menningarsýning verður opin til 15. september og verður sett upp aftur vorið 2010.